Lei Haliʻa

He ahu aʻo Lanihuli
No ka noe o Nuʻuanu
Nuʻalia i ka pōʻai pali
I ka pā iki mai o ke Kona ē

Hui:
He ʻohu i ka lei haliʻa
ʻAla māpu i ke anuhea
Hea mai i ke aumoe
Moemoeā, moe mālie i ka poli ē

Luhiehu ka lau o ka palai
Pāpālua i ke kilihuna
Kilihea ka liko ʻāhihi
Hīhīmanu, hihipeʻa me ka maile ē

ʻAuamo ʻo Konahuanui
I ke ao hākumakuma
Kū māhiehie kilohana
Ua pō i ke ʻala hīnano ē