I Keauhou Ka ʻŌnohi A Ka Lāhui

He nani ka welina mai o nā Kona
Welo ana Kānehoalani i ka ‘ōpua
‘Ike ‘ia ‘o Hina ano i ke alo pali
Eia Kahalu‘u hoapili no Keauhou

Pua mai ka wana‘ao i Hāpaiali‘i
I ke kai milimili paepae kapu
He pa‘a mau ma ia hea a ka lani
I kahua no nā pua liko i ka na‘auao

Ua ao maila ka ‘ihi‘ihi kū
‘Ōhi‘a la‘ilua poli o Keanaki‘i
Hi‘ia na ka ‘ie‘ie ala pā i ke kupukupu
Me nā manu e hone nei Kaukahōkū

Kau maila i ka uka Pu‘ulehua
Kū kilakila nā kia‘i ‘ekolu
Hanohano Lupea pua o ka māmane
I Pu‘uhonua ho‘i no ka ‘iliahi

Ho‘i ke aloha no ka ‘āina
Ke Ali‘i ho‘oheno o nā kama
I Keauhou ka ‘ōnohi a ka lāhui
‘O Pauahilani i ka mālamalama

Source: Song Contest 2012 program