Mahaiʻula

Haele aʻe kāua lā
I ke kono a ka makemake
E kipa, e luana, e hoʻonanea
Me Puanani a me Kapala

A hiki i Kailua
Kau i ka moku "Imua" he inoa
ʻAu aku o ia kai loa
Kaulana Kona i ke kai malino

Kū i ke awa ʻo Mahaiʻula
He ani lima kaʻu ʻike aku
Kau i ka waʻapā hoe lima
A pae aku i ka ʻāina

Hauʻoli nā makamaka
Pumehana ka ʻapo ʻana mai
Honi aku, a honi mai
Ke aloha ia a ka Hawaiʻi

Kipa i ka ʻolu o ka home
Hoʻolaʻilaʻi me nā hoa
Moani ke ʻala o nā pua
ʻOliana, aloalo, pua kalaunu

Unu mai nā ʻono o ke kai
Hui me nā wai kau o Maleka
Ua ʻai, ua inu a kena
ʻAʻohe mea i koe aku

Aloha e ka leo o kahi ʻenekini
I ka hone mai nā hola like ʻole
E haʻi mai ana i ka nūhou
Ua ʻā ka uila ia kahakai

Hoʻohihi au i ka liʻulā
I ka ʻā mai i ka welelau o ka honua
Eia mahina kau ahiahi
E hoʻoipoipo ana me Hōkū Loa

Hui:
He nani, a he nani maoli nō
Mahaiʻula i ka laʻi
Hāliʻi maila ka loa
Me ke kai kahakai kiʻi lihilihi i ke one
E ō, e Puanani me Kapala kou inoa

Source: Song Contest 2025 program